حدوته الفاره و المركب
كان يا ما كان فيه فارة عايشة على شطّ النهر
و في يوم من الأيام حبّت تعدّي النهر عشان تزور عمتها اللي ساكنة على الشط التاني، لكنها مكانتش لاقية حاجة تركبها عشان تعدّي فيها النهر.
قعدت الفارة تدور وتفتش لغاية ما لاقت قشرة بيضه
قامت راكبة في قشرة البيضة وقعدت تجدّف في النهر بعود كبريت.
وبعد شوية سمعت صوت بيقول: مين اللي في المركب والمركب عمالة تكركب؟
ردت الفارة وقالت: أنا الفارة، وإنت مين؟
- أنا الصرصارة
- عايزة إيه يا صرصارة؟
- عايزة أركب معاكي
- طيب يالا تعالي نطي
نطت الصرصارة في قشرة البيضة، وفضلوا يجدّفوا، يجدفوا، والنهر يعمل : ووش ووش ووش
، لغاية ما سمعوا صوت بيقول:
مين اللي في المركب والمركب عمالة تكركب؟
قالوا: إحنا الفارة والصرصارة، وإنت مين؟
- أنا الفرخة الحمرة النقارة
- عايزة إيه يافرخة حمرة و نقّارة؟
- عايزة أركب وياكم
- يالا تعالي نطي
و نطت الفرخة في قشرة البيضة، وفضلوا يجدفوا، ويجدفوا، والنهر يعمل:ووش ووش ووش،
لغاية ما سمعوا صوت بيقول : مين اللي في المركب والمركب عمالة تكركب؟
- إحنا الفارة والصرصارة والفرخة الحمرة النقارة، وإنت مين؟
- أنا الديك اللي بيدّن في السحّارة ( يعني الفجر)
- عاوز إيه يا ديك؟
- عاوز أركب معاكم
- يالا نط
و نط الديك في قشرة البيضة، وفضلوا يجدفوا ، والنهر
يعمل ووش ووش ووش،
لغاية ما سمعوا صوت بيقول : مين اللي في المركب والمركب عمالة تكركب؟
- إحنا الفارة والصرصارة والفرخة الحمرة النقارة والديك اللي بيدن في السحّارة، وإنت مين؟
- أنا الخروف اللي بياخدوا منه الصوف
- عاوز إيه ياخروف؟
- عاوز أركب وياكم
- يالا نط
و نط الخروف في قشرة البيضة، وفضلوا يجدفوا ويجدفوا، والنهر يعمل وش وش وش
لغاية ما سمعوا صوت بيقول: مين اللي في المركب والمركب عمالة تكركب؟
- إحنا الفارة والصرصارة والفرخة الحمرة النقارة والديك اللي بيدّن في السحّارة والخروف اللي بياخدوا منه الصوف، وإنت مين؟
- أنا الفيلفلفيلوه أبو زلومه طويله
- عاوز إيه يافيل؟
- عاوز أركب معاكم
- يالا نط
و نط الفيل في قشرة البيضة، وفضلوا يجدفوا و يجدفوا، والنهر يعمل ووش ووش ووش،
لغاية ما سمعوا صوت رفيع خالص بيقول: مين اللي في المركب والمركب عمالة تكركب؟
- إحنا الفارة والصرصارة والفرخة الحمرة النقارة والديك اللي بيدّن في السحّارة والخروف اللي بياخدوا منه الصوف والفيل فلفيلوه ابو زلومه طويله، وإنت مين؟
– أنا البرغوت اللي بيقرص بالنبّوت ( من شدة القرص)
– عاوز إيه يا برغوت؟
– عاوز أركب و ياكم
– يالا نط
ونط البرغوت في قشرة البيضة وقعد يقرص فيهم و يقرص فيهم لغاية ما انقلبت المركب ووقعوا كلهم في النهر،
وفضلوا يعوموا لغاية ما وصلوا الشط التاني
.......ووصلوا كلهم عند عمة الفارة.......
(تعلوب والارنب الى مش بيسمع الكلام )
كان ياماكان ،، في سالف العصر والاوان ،،
وقبل الاوان بأوان
وما يحلى الكلام إلا بذكر النبى حبيب الرحمن
عليه الصلاة والسلام
كان في أرنب اسمة (أرنوب) وعايش مع مامتة الست (أرنوبة)
(أرنوب) كان أرنب صغير وجميل لكن للأسف مش بيسمع الكلام
وفي يوم من الايام الست أرنوبة نادت على أرنوب وقالت
أنا رايحة السوق ياأرنوب ماتخرجش برا البيت
ولاتفتح الباب خصوصا للتعلب ( تعلوب)
هز أرنوب راسة وقال
حاضر ياأمى
خرجت الست أرنوبة من البيت وراحت علي السوق
قعد أرنوب زعلان وغضبان وبيقول لنفسة
أنا عاوز ألعب برا البيت وماما خايفة على و
أنا مش عارف أعمل إية
فكر أرنوب شوية وقال
أيوة أنا عندى فكرة أنا هروح ألعب وأرجع بسرعة قبل ماما
ماترجع من السوق
خرج أرنوب وقعد يلعب ويجرى وياكل جزر وكان سعيد وفرحان جداااااا
وفجاة شاف قدامة التعلب ( تعلووب )
خاف أرنوب جدا وجرى بسررعة واستخبى عشان تعلوب مايعرفش
مكانة
وخرج أرنوب بيجرى وهو زعلان وخايف يتلفت يمين وشمال وأتاكد ان تعلوب مشى
رجع أرنوب البيت وكانت الست أرنوبة رجعت من السوق
وكانت خايفة على أرنوب وزعلانة جداا منة
راح
أرنوب لمامتة وقال
أنا أسف ياأمى أنا غلطت وماسمعتش كلامك
وأنا إتاكدت إن كلامك صحيح
الست أرنوبة قالت
خلاص ياأرنوب أنا سامحتك
وراحت جابت لة
جزر وخس
فرح أرنوب جداا وقعد ياكل وقال
أنا لازم بعد كدا أسمع كلام أمى لأنها بتخاف على
وبتحبى ومش لازم أزعلها تانى أبدا منى
وتوتة توووووووووووتة
خلصت الحدوتة
الفراشة الصغيرة
لم تتخيل الفراشة الصغيرة أنها ستبتعد عن
منزلها هذه المسافة ... همست لصاحبتها ،
يجب أن نعود ، أمي نبهتني ألا نخرج من المزرعة ..
تعالت ضحكات
الرفيقة : جبانة ، اعلم انك جبانة .. هيا .. تعالي
سأريكِ زهرة عذبة العطر
حاولت ألا تستجيب لنداء رفيقتها لكنها لا تحب أن يقال
عنها جبانة ، انطلقت مع رفيقتها حتى وصلتا لزهرة
تفوح منها رائحة طيبة .. تمايلت الفراشة إعجابا برائحة الزهرة ، وتلك الألوان الجميلة التي تزين صفحاتها ،
نعم يبدو عسلها طيب الطعم .. نظرت الفراشتان
لبعضهما وانطلقتا كصاروخ موجه لقلب النبتة ،
وانغمستا بين ثناياها تلتهمان قطع العسل المتناثرة
بين زوايا حبيبات الطلع بنهم وشره ... نسيت الفراشة الصغيرة نصيحة أمها : إياك الابتعاد عن حدود المنزل
، إياك الاقتراب مما لا تعرفين أصله .. نسيت
كل شئ إلا طعم حبيبات العسل ..
بينما استغرقتا بالتهام طعامهما المفضل سادت
السماء ظلمة غريبة .. رفعت الفراشة الصغيرة
رأسها بعد أن انبئتها قرون الاستشعار بخطر قريب
، ورأت الكارثة .. أوراق الزهرة ترتفع بهدوء ، هدوء
شديد في محاولة لضم فراشتان حسناوان
اكتشفتا انهما ضحية فخ نصبته الزهرة لهما
لتكونا وليمة دسمة لمعدة جائعة !!
حاولتا التملص لكن الأوراق تضيّق
الخناق عليهما حتى بات الموت وشيكا .. بدأ الاستسلام يدب فيهما إلى أن مُدّت ورقة صغيرة في
قلب الزهرة تمسكتا بها جيدا لتنقلهما
لجانب بعيد عن الخطر .. بتعب نظرت
الفراشة الصغيرة لمنقذها ، كانت أمها ،
ابتسمت بتعب شاكرة ،
كان آخر ما سمعته من أمها : خبرتني
جاراتي الفراشات أنكما ذهبتما باتجاه
آكلة الحشرات ، فلحقتكما .. باتت تستسلم
للنوم ولسانها يردد بثقل : أخر مرة يا أمي .. آخر مرة
الفيل فلافيلو
كان يا مكان في فيل ضخم وكبير قوي الفيل دة اسمة الفيل فلافيلو
كانت ودانة كبيرة قوي وعندة زلومة كمان طويلة و نابين كبار قوي طالعين من بقة
وجسمة تخين خالص ورجلية كمان
وكان عندة اتنين صحاب ديما يلعب معاهم وبيحبهم قوي اصحابة هما الحصان رهوان
وكمان الحمامة البيضا فلة
في يوم كان بيلعب معاهم بس علشان جسمة التقيل كان بيتعب بسرعة وميقدرش يجري معاهم علي طول وكان ديما يعطلهم ويوقفهم عن اللعب
وفي يوم قالولة احنا تعبنا منك ومش حنلعب معاك تاني كل شوية تخلينا نوقف لعب علشان خاطرك
وسابوة ومشيوا
قعد فلافيلوا جنب شجرة كبيرة وفضل يعيط ويقول .........
انا مش عايز وداني الكبيرة دي لية ميكونش عندي وش جميل وودان صغيرة زي الحصان رهوان
ومش عايزة الزلومة الكبيرة والطويلة قوي دي وحشة خالص
والنيبان الكبار دول فايدتهم اية بقي ؟؟
وكمان ديلي الصغير لية ميكونش عندي ديل جميل وطويل زي رهوان
ورجلي التخينة قوي دي
لية ربنا مخلقنيش رفيع وحلو وابيض زي الحمامة فلة
وقعد يعيط جامد
ومشافش السلحفة العجوزة والحكيمة سوسة وهي بتقرب منة
وقالت لة بصوت واطي ...مالك يا فلافيلوا
قعد يحكيلها علي اللي عملوة اصحابة معاة
قالت السلحفة .........اصحابك دول متعيطتش عليهم ميستهلوش الاصحاب بيحبوا بعض ويحترموا بعض ومش مهم اصحابهم شكلهم ازاي
..........الفيل فضل يعيط ويتمني ان شكلة يتغير وفضل يزعق ويقول ......... انا ماليش دعوة انا مش عايز شكلي الوحش دة انا عايز ابقي جميل ورفيع زي رهوان وفلة
السلحفة قالت لة .........خلاص براحتك طالما عايز تغير خلقة ربنا اللي ادهالك انا حساعدك باللي اقدر علية
قالت لة تعالي امسك ايديا وقول ورايا
دابرا كدابرا بصوت عالي
نفذ فلافيلوا كلامها وفجأة لقي نفسة بيلف بسرعة وبيقف برضة بسرعة
ولقي ودانة صغيرة وزلومتة اختفت وديلة طول ورجلية بقت رفيعة قوي
وبعد ما شكر السلحفة سوسة جري علي اصحابة اللي فرحوا قوي بشكل صاحبهم الجديد
وفضلوا يلعبوا كتير قوي لغاية ما وقفوا علشان ياكلوا ويشريوا
الحصان راح ياكل من حشيش الارض ويشرب من النهر
والحمامة طارت لعشتها تاكل وتشرب هناك
لكن الفيل لما راح ياكل معرفش
علشان زلومتة اللي بيقطع بيها ورق الشجر مش موجودة
راح يشرب معرفش علشان زلومتة اللي بيملأ بيها المية من النهر مش موجودة وفجأة تعب وفضل يصرخ .........أأأأأأأأأأأأة يا رجلي رجلي بتوجعني
عارفين لية علشان رجلة الرفيعة مستحملتش جسمة الكبير قوي
وفضل جعان وعطشان ويقول لأصحابة
انا جعاااااااااان قوي انا عطشااااااااااااااان قوي انا تعبااااااااااااان قوي
واصحابة قالوا لة .............هو انت عايزنا نأكلك زنشربك وكمان نعالجك
يوووة احنا زهقنا منك
وسابوة لوحدة ومشيوا
وفضل فلافيلوا قاعد لوحدة لغاية ما الدنيا ضلمت والحشرات طلعت علي راسة وقعدت تقرصة
وقعد يهز ودانة علشان تمشي مالقيش ودانة الكبيرة اللي بتخوف الحشرات وتمشيها
وقعد يعيط ويقول لنفسة .......انا اللي مرضيتش بخلقة ربنا اللي ادهاني وغيرت من شكلي علشان اصحاب ميستهلوش
وفجأة ..........شاف في الضلمة عيون بتلمع وبتقرب منة وعرف انة اكيد الاسد وجاي علشان ياكلة وفضل يجري والاسد وراة
وكل ما يجري الاسد يجري لغاية مالحقة ومسكة من ديلة الطويل قوي
وفجأة ظهرت السلحفة العجوزة والحكيمة سوسة ولما شافها الاسد ساب الفيل فلافيلو وجري
وقعدت تبص لفلافيلو وهو بيعيط ويقولها انا عرفت غلطتي خلاص ومش حعمل كدة تاني واللي عايز يبقي صاحبي يرضي بشكلي زي ما خلقة ربنا
رجعيني تاني زي ما كنت
السلحفة قالت لة .......... المهم ترضي انت عن نفسك وشكلك
امسك ايدي وقول بصوت عالي ..........دابرا كدابرا
وتوتة توتة وفرغت الحدوتة
الاسد ملك الغابه
كان ياماكان ،، في سالف العصر والاوان ،،
وقبل الاوان بأوان
وما يحلى الكلام إلا بذكر النبى حبيب الرحمن
عليه الصلاة والسلام
كان في فار صغيور إسمة الفار ( فرفور)
الفار فرفور كان ماشي يلعب في الغابة وفجأة مشي على رجل الاسد الى كان نايم في الغابة
صحى الاسد وقال للفار فرفور
انت الي صحتنى ودوست على رجلى يافرفور
فرفور خاف من الاسد وقال
أنا أسف ياملك الغابة ومش هعمل كدا تانى
سامحنى أرجوووك
ملك الغابة رد وقال
أنا لازم أكلك
بكى فرفور وقال
أرجوك سامحنى وأنا أوعدك إنى هساعدك لما تقع غي أى مشكلة
ضحك الأسد وقال
انت يافرفور ياضعيف هتنقذ وتساعد ملك الغابة
يلا امشي أنا خلاص سامحتك
فرح فرفور ومشي
وفي يوم من الايام كان فرفور ماشي في الغابة شاف الاسد
كان واقع في شبكة الصياد
فرفور قال للاسد
ماتخافش ياأسد أنا هخلصك من الشبكة
وراح فرفور يقرقض في الشبكة وعمل فتحة كبيرة وخرج منها الاسد
جرى الاسد وفرفور بعيد عن شبكة الصياد
قال الاسد لفرفور
أنا أسف يافرفور
بالرغم من حجمك الصغير لكن قدرت تخلصنى من شبكة الصياد
أشكرك جدااا ياصديقي
وعاش الاسد والفار فرفور وأصبحوو أصدقاء على
طووول
وتوتة توووووووووووتة
خلصت الحدوتة
بطوط وجدو حبيبه
كان في بطوط مامته وباباه مسافرين وكان عايش مع جدو فريد في بيت العيله
وكان جدو بيحبه وبيحب كل احفاده
و بطوط كان بيحب جدو بس كان عنيد و مبيسمعش الكلام وجدو كان بيزعل منه كتير
وبعد ما بطوط خد الاجازه من المدرسه وكان جدو عنده حديقه كبيره كان عايز بطوط
يساعده في تنضيفها بس بطوط كان عايز يقضي الاجازه كلها في اللعب من غير ما يساعد جدو
وفي مره جدو صحي وبيبص في الحديقه هو واحفاده
لقى بطوط بيقطع الورد و يدوس على الزرع اللي في الحديقه
جدو زعل منه اوي و دخل غرفته غضبان
و بطوط حس بالذنب انه زعل جده و انه ماكنش بيساعده
وراح بطوط بعد كده ينضف الحديقه عشان يعملها مفاجأه لجدو ويتبسط منه
ولما جدو صحي من النوم بطوط عملهاله مفاجأه وفرجه على الحديقه
و بطوط قاله انا اسف يا جدو لازم نقضي الاجازه في حاجه مفيده مع اللعب
وجدو سامحه وده شكل الحديقه بعد ما بطوط نضفها
و توته توته خلصت الحدوته
ها القصص عجبتكوا
وتوته توته خلص الموضوع
الإثنين أغسطس 08, 2011 2:11 am
